Tërmeti me magnitudë 5.8 godet Porto Rikon, nuk raportohet për viktima

Një tërmet i fuqishëm ka goditur Porto Rikon ditën e djeshme. Raportohet se dëmet materiale janë të shumta, ndërkohë fatmirësisht nuk ka asnjë informacion për ndonjë jetë të humbur

Një tërmet me një magnitudë prej 5.8 i shkallës Rihter ka goditur bregun jugor të Porto Rikos ditën e djeshme, duke shkatërruar shtëpi të shumta, por pa pasoja në jetë njerëzish.

Tërmeti ishte më i fuqishmi në një seri lëkundjesh që kanë përfshirë vendin prej tanimë dy javësh. Shumë shtëpi janë shkatërruar në qytetet e Guanikës dhe Guajanija. Imazhet e televizionit vendas tregojnë se si godinat kanë zënë makinat e parkuara në katet përdhese.

 “Isha duke fjetur kur shtëpia nisi të binte pak nga pak. Kapa çantën që e kisha bërë gati dhe dola me vrap jashtë duke u hedhur nga ballkoni. Ishte tmerr. Nuk ja uroj njeriu”- tha një prej banorëve.

Guvernatorja e Porto Rikos është shprehur se ka mbledhur një skuadër të posaçme për të vlerësuar dëmin e tërmetit, ndërkohë që vendi ka humbur një formacion shkëmbor të quajtur “Dritarja e Karaibeve”, në një plazh që terhiqte shumë turistë.