Tërmeti në Rusi, Japonia u kërkon 1.9 mln banorëve evakuimin nga frika për cunami

Autoritetet në Japoni u kanë kërkuar mbi 1.9 milion banorëve të evakuohen si pasojë e paralajmërimeve për cunami që kanë përfshirë bregdetin lindor të vendit.

Rreth 10,500 persona ndodhen në Hokkaido, ku pamjet nga mediat lokale tregojnë qytetarë të mbledhur në një çati për siguri.

Disa njerëz janë parë gjithashtu në një observator me pamje nga plazhi në Chiba, në jug të Tokios.

Autoritetet japoneze kanë bërë thirrje të vazhdueshme që banorët e zonave bregdetare të zhvendosen drejt vendeve më të larta, për të shmangur rrezikun nga valët e mundshme.

“Cunami ende po vëzhgohen dhe ekziston rreziku i dëmeve nga tsunami”, thuhet në të. “Cunami mund të godasë papritur. Ju lutemi mos largoheni nga vendet e sigurta derisa të hiqet paralajmërimi. Kur cunami përkon me baticën e lartë, ekziston mundësia që niveli i ujit të rritet më shumë se sa është aktualisht”, thuhet në deklaratën zyrtare.

Dhjetëra valë janë vërejtur përgjatë bregdetit të Paqësorit të Japonisë, ndërsa paralajmërimet për evakuim tani përfshijnë një zonë të gjerë — nga Hokkaido në veri, deri në prefekturën Wakayama në jug.

Agjencia Meteorologjike e Japonisë paralajmëroi se valët e cunamit mund të arrijnë deri në 3 metra lartësi.

Kujtojmë që një tërmet i fuqishëm me magnitudë 8.8 ballë të Rihterit goditi Gadishullin Kamchatka në lindje të largët të Rusisë rreth orës 11:25 të mëngjesit sipas kohës lokale të mërkurën, duke shkaktuar paralajmërime për cunami dhe urdhra evakuimi në SHBA dhe Japoni.

LEXONI GJITHASHTU:

• Tërmeti 8.8 ballë godet gadishullin e Kamchatka në Rusi, shkakton cunami
• SHBA arrin një nga marrëveshjet “gjigante” ekonomike me Japoninë