Thaçi: Bashkimi i shqiptarëve në Luginën e Preshevës dha rezultatin e pritur

Presidenti i Kosovës, Hashim Thaçi komentoi rezultatin e zgjedhjeve në Serbi duke thënë se bashkimi i shqiptarëve në Luginën e Preshevës e dha frytin e tij.

Sipas z. Thaçi tashmë do të ketë më shumë deputetë që do të ngrenë zërin për të drejtat e shqiptarëve në shtetin fqinj.

“Bashkimi i shqiptarëve në Luginën e Preshevës e dha rezultatin e tij. Ata tashmë do të kenë më shumë deputetë që do ta ngrehin zërin për të drejtat e shqiptarëve atje.

Bashkërendimi i veprimeve politike jep gjithmonë rezultate dhe Alternativa Demokratike Shqiptare është shembull i mirë për t’u ndjekur nga bashkëkombësit tanë kudo që jetojnë”, shkroi Thaçi në Facebook.

Nga rezultatet paraprake pas zgjedhjeve të zhvilluara dje në Serbi, Alternativa Demokratike Shqiptare – Lugina e Bashkuar, fitoi rreth 1 për qind të votave dhe shpreson të ketë të paktën 3 vende në parlament.

Katër subjektet e Partisë për Veprim Demokratik, Alternativës për Ndryshim, Lëvizjes për Progresin Demokratik dhe Lëvizjes për Reforma e Partisë Demokratike Shqiptare garuan me një listë të unifikuar në zgjedhjet parlamentare me qellim fuqizimin e zërit të votuesve shqiptarë që jetojnë në Luginën e Preshevës.