Gjendet i pajetë në një rezervuar në Korçë 25-vjeçari nga Lushnja, shenja dhune në trup

Trupi i pajetë i një 25-vjeçari nga Lushnja, që duhej të ishte në arrest shtëpie, është gjetur në rezervuarin e Gjançit në Korçë.

Ekspertët e policisë, pasi kanë ekzaminuar kufomën, kanë vërejtur shenja të shumta dhune në trupin e viktimës, duke dyshuar për momentin se 25-vjeçari është keqtrajtuar për vdekje në një vend tjetër dhe pastaj është transportuar dhe hedhur në rezervuarin e Gjançit, në zonën e Vithkuqit në Korçë.

Viktima Fridman Xhaferraj, më datën 21 maj është liruar nga dhomat e paraburgimit duke u lënë në arrest shtëpie në fshatin Plug të Lushnjës, i akuzuar për zjarrvënie të pronës së tjetrit, përfshirë 3 makina pranë një qendre tregtare. Policia shprehet se po punohet për sqarimin e gjithë dinamikës së ngjarjes.