Tirana bën goditjen e parë, nis merkato në superiore, skuadrat të kujdesshme në zgjedhje

Tirana ka realizuar goditjen e parë në merkato, duke afruar sulmuesin e Kombëtares së Shqipërisë, Taulant Seferi.

Kampionët në fuqi njoftuan se është arritur marrëveshja me zviceranët e Jang Bojs, për të huazuar për pjesën e mbetur të sezonit lojtarin nga Kumanova. Një lëvizje e papritur nga bardheblutë, të cilët kanë bërë  zyrtarizmin e parë në këtë merkato.

Seferi ka provuar të luajë në disa skuadra në Zvicer, ndërsa tani do të provojë veten në superiore, ku pretendon titullin kampion me bardheblutë.

 Tirana pritet të jetë një nga ekipet më aktive në merkato, pasi pretendimet e bardhebluve janë të mëdha dhe 12 javët e para kanë treguar dhe pikat ku ka nevojë për ndërhyrje.

Merkato e janarit konsiderohet si një periudhë riparimi, por alternativat që ofrohen janë të pakta dhe klubet e Superiores, ndryshe nga vitet e shkuara po tregohen të kujdesshme për të mos u nxituar, pasi asnjë ekip tjetër nuk ka zyrtarizuar ndonjë përforcim.