Tirana me dy deputetë më shumë, Dibra me Gjirokastra humbin nga një

Komisioni Qendror i Zgjedhjeve ka propozuar që qarkut të Dibrës dhe Gjirokastrës t’u hiqen nga një mandat deputeti dhe ato t’i shtohen qarkut të Tiranës. Kështu, Dibra nga 6 deputetë që kishte deri më sot, tashmë do të ketë 5 dhe Gjirokastra nga 5, do të ketë 4 mandate.

Ndërsa Tirana nga 34 do të bëhet me 36 mandate. Mbrëmjen e së enjtes në emisionin “Me Pak Fjalë” në Euronews Albania u shpjegua se përse KQZ ka propozuar këto ndryshime.

Në  Regjistrin Kombëtar të Gjendjes Civile rezultojnë 4 544 977 shqiptarë të regjistruar. Kjo do të thotë se 1 nga 140 deputetët e parlamentit përfaqëson 32 464 persona. Kuvendi i Shqipërisë ka 140 deputetë ndaj kur ndryshon popullsia e zonave, Kodi Zgjedhor kërkon rishpërndarjen e mandateve për t’ju përshtatur shpërndarjes së re të popullsisë në to.

Për të përftuar numrin e mandateve që ka një qark, pjesëtohet numri i popullsisë së atij qarku me 32 464. Në rastin konkret, Dibra dhe Gjirokastra kishin respektivisht 6 dhe 5 deputetë. Por nga zgjedhjet e fundit parlamentare të vitit 2017 popullsia e këtyre qarqeve është tkurrur, ndërsa ajo e kryeqytetit është shtuar.

Sipas të dhënave nga Regjistri i Gjendjes Civile, dhe llogarive të “Me Pak Fjalë”, rezulton se në vitin 2020, qarku i Dibrës ka më pak qytetarë nga sa duhen për të patur 6 përfaqësues në parlament. Konkretisht në Dibër do të duheshin edhe 21 mijë qytetarë më shumë për të patur 6 mandate.

Në Gjirokastër do duheshin edhe 14 mijë qytetarë, për të patur 5 mandate. Nga ana tjetër, qarku i Tiranës ka rreth 54 mijë qytetarë të pa përfaqësuar dhe për këtë arsye u propozua të shtohen dy mandatet që janë hequr në Dibër dhe Gjirokastër.