Tirana një hap larg titullit| Java e 31-të, bardheblutë fitojnë me përmbysje në Korçë

Tirana fiton me përmbysje në Korçë duke iu afruar akoma dhe më shumë titullit kampion. Bardheblutë tashmë e shohin veten vetëm një hap larg titullit, pasi e kanë mundësinë që të sigurojnë matematikisht që në takimin e radhës, ku do të ndeshen me Kukësin e vendit të dytë.

Majkëll Ngo ishte heroi i mbrëmjes për kryeqytetasit në takimin e së dielës. Korçarët shënuan në pjesën e parë me Mensah, por anglezi gjeti dy herë rrugën e rrjetës në fraksionin e dytë, në harkun kohor të pak minutave.

Një sukses shumë i rëndësishëm për ekipin e Emanuel Egbos, që i afrohet gjithnjë e më shumë suksesit të shumëpritur.

Fiton dhe Kukësi, që në takimin me Bylisin vuajti jo pak. një 11-metërsh mjaft i kontestuar nga ballshiotët u kthye në gol nga Vasil Shkurtaj, por diferenca me vendin e parë mbetet 9 pikë e titulli duket se do të mbetet një ëndërr në sirtar për kuksianët.

Në takimin tjetër të së dielës Teuta fitoi me rezultatin 3-0 në fushën e Vllaznisë. Pas rezultateve të javës së 31=të gara për zonën europiane bëhet mjaft e fortë, pasi diferenca nga Teuta e vendi të tretë deri tek Partizani i vendit të gjashtë është vetëm 3 pikë.