Tjetër zhgënjim nga Kosova, dardanët u mundën në shtëpi nga Sllovenia

Pas zhgënjimit me Maqedoninë e Veriut, Kosova ka pësuar një tjetër humbje, këtë herë në stadiumin “Fadil Vokrri”.

Dardanët u mundën nga Sllovenia, duke konfirmuar dhe një herë tjetër se po kalojnë një moment mjaft të vështirë, pasi suksesin e fundit e kanë regjistruar një vit më parë, saktësisht më 14 tetor të vitit të shkuar. 

Skuadra e Challandes e pati të vështirë të tregonte rrezikshmëri në portën e skuadrës sllovene, me portierin Oblak, që në shumë pak raste e pa veten në vështirësi.

Goli i Vuçkiç që në pjesën e parë vendosi fatin e kësaj përballjeje.

Kosova ka grumbulluar vetëm një pikë pas tre ndeshjesh, po aq sa Moldavia dhe e sheh veten në vendin e tretë në grupin tre të Ligës C, duke rrezikuar dhe rënien një ligë më poshtë.

Në takimet e tjera të së dielës, mund të veçohet sfida mes Francës dhe Portugalisë.

Interesante dhe përballja mes Kilian Mbape dhe Cristiano Ronaldo. 

Pavarësisht rasteve të krijuara, takimi u mbyll me rrjeta të paprekura.

Anglia në anën tjetër fitoi me përmbysje ndaj Belgjikës.

Lukaku e gjeti rrugën e rrjetës i pari, por më pas ishin vendasit ata që shënuan dy herë, duke marrë një tjetër fitore e duke mbajtur vendin e parë në grupin dy të Ligës A.