Tottenham-Manchester United, Mourinho ka në dispozicion gjithë skuadrën

Ndërprerja e aktiviteteve futbollistike nuk ka qenë gjë negative për të gjitha skuadrat në Angli.

Më i lumturi për këtë ndërprerje, duket të jetë trajneri portugez Jose Mourinho, i cili ka arritur të rikuperojë lojtarët e lënduar dhe tani ka të gjithë organikën në gatishmëri.

Kampionati anglez u ndërpre pas javës së 29-të në muajin mars për shkak të pandemisë së COVID-19. Në atë moment portugezi po vuante shumë me formacionin pasi nuk kishte një sulmues kryesor.

Sulmuesit Harry Kane dhe Son ishin të lënduar dhe trajneri ishte i detyruar të improvizonte me formacionin gjë që solli edhe një seri rezultatesh të dobëta.

Por tani ai do të ketë të gjithë organikën e plotë për ndeshjen e së premtes përballë Manchester United, ish-skuadrën që drejtonte më parë.

Në fakt ndeshja kundër United-it për Mourinhon do të jetë e veçantë, pasi betejën e parë të këtij sezoni portugezi e ka humbur dhe tani synimi është që të dalë fitimtar në të dytën.

Të dyja skuadrat janë në luftë për të siguruar pjesëmarrjen në kupat e Evropës dhe kjo do jetë një ndeshje mjaft e rëndësishme për to.