Trajneri i Kombëtares U-21 Alban Bushi rezulton pozitiv me Covid-19

Trajneri i Kombëtares U-21, Alban Bushi nuk do të jetë në drejtimin e skuadrës për dy ndeshjet e radhës, pasi ka rezultuar i infektuar me covid-19. Tekniku i “Shpresave” është futur në izolim menjëherë pasi ka marrë përgjigjen e tamponit.

Federata Shqiptare e futbollit ka njoftuar se për sfidat me Kosovën dhe Anglinë, në drejtimin e 21-vjeçarëve do të jetë Dzemal Mustedanagiç, i cili punon me skuadrat e moshave të Kombëtares për gati 10 vitesh. 

“Alban Bushi nuk do të jetë në gjendje që të drejtojë ekipin Kombëtar U-21 në dy ndeshjet e radhës. Kjo sepse tekniku i 21-vjeçarëve ka dalë pozitiv me Covid-19 pas testimit me tampon. Kundër Kosovës dhe Anglisë, ekipin do ta drejtojë specialisti i njohur dhe një prej ish-trajnerëve të kombëtares shqiptare, Dzemal Mustedanagiç. Në kushtet e emergjencës Federata dhe Drejtoria Teknike ka vendosur t’ia besojë drejtimin e kuqezinjve, specialistit që ka mbi një dekadë që shërben në Shqipëri”, njoftoi FSHF-ja.