Tre persona grabisin me armë shtëpinë e futbollistit të Romës, detyrohet të hapë kasafortën

Futbollisti i Romës, Chris Smalling dhe familja e tij ra pre e një grabitje me armë mëngjesin e së premtes.

Mediat italiane raportuan duke cituar burime pranë klubit se shtatlarti nuk u paraqit mëngjesin e sotëm në stërvitje për shkak se tre persona të armatosur i mësynë shtëpinë në kryeqytetin italian duke i grabitur sende me vlerë.

Ngjarja ka ndodhur rreth orës 5:00 të mëngjesit teksa policia ka nisur menjëherë hetimet. Prokuroria tha se grabitësit dyshohet të kenë qenë italianë. Mediat lokale thonë se futbollisti dhe familja e tij u detyruan nën kërcënimin e armëve që të hapnin kasafortat në të cilat mbanin sende me vlerë si ora, bizhuteri apo para.

Smalling nuk udhëtoi me skuadrën e Romës në Holandë të enjten, pasi është i lënduar në gju. Ai e pa ndeshjen me Ajax-in e vlefshme për çerekfinalet e Europa League me familjen në shtëpi.

Ish-shoku i tij i skuadrës, sulmuesi i Manchester United, Marcus Rashford ndau në rrjetet sociale një postim mbështetës, në të cilin tha se i qëndron afër dhe shpreson që kjo situatë “të kalojë sa më shpejt”.