Tre portierët infektohen me COVID-19, Ukraina përfshin në skuadër trajnerin 45-vjeçar

Trajneri i përfaqësueses ukrainase, Andriy Shevchenko është detyruar të përfshijë në skuadër trajnerin e portierëve Oleksandr Shovkovskiy, i cili është tërhequr nga futbolli i luajtur që prej vitit 2016.

Vendimi u mor pasi tre portierët e skuadrës Andriy Pyatov, Yuriy Pankiv dhe Andriy Lunin, rezultuan me COVID-19 dhe skuadra mbeti me vetëm një portier, Georgiy Bushchanin, përpara përballjes miqësore me Francën që zhvillohet të mërkurën në mbrëmje.

“Shovkoskiy i dha fund karrierës si lojtar në dhjetor 2016, por ka mbajtur formë të mirë fizike duke u përfshirë vazhdimisht në fazat stërvitore,” – u tha në një deklaratë të Federatës Ukrainase të Futbollit.

Gjasat që 45-vjeçari Shovkovskiy të hidhet në fushë, janë të pakta. Kjo do të ndodhë vetëm nëse Bushchan rezulton me COVID-19, ose lëndohet.

Megjithatë vendimi se ai është i gatshëm për përfaqësuesen u bë lajm i gjerë për faktin se përgjithësisht pas të 30-ve futbollistët tërhiqen përfundimisht nga loja.

Shovkovskiy konsiderohet legjendë e gjallë e futbollit ukrainas. Ai luajti për 25 vite me Dinamon e Kievit duke fituar 14 herë kampionatin, 10 herë kupën dhe 5 herë të tjera super-kupën e vendit.