Tre vullnetarë të Kryqit të Kuq humbin jetën nga virusi Ebola në Kongo

Tre vullnetarë të Kryqit të Kuq kanë humbur jetën nga virusi Ebola në provincën Ituri, në lindje të Republikës Demokratike të Kongos, duke u bërë viktimat e para të njohura të shpërthimit të fundit të sëmundjes.

Federata Ndërkombëtare e Shoqatave të Kryqit të Kuq dhe Gjysmëhënës së Kuqe (IFRC) shprehu keqardhje për humbjen e vullnetarëve Ajiko Chandiru Viviane, Sezabo Katanabo dhe Alikana Udumusi Augustin, të cilët ndërruan jetë mes 5 dhe 16 majit në degën lokale Mongbwalu, në territorin Djugu.

Sipas IFRC-së, ata dyshohet se u infektuan gjatë kryerjes së detyrës, ndërsa trajtonin trupa të pajetë në kuadër të një misioni humanitar që nuk lidhej me virusin Ebola.

“Në kohën e ndërhyrjes, komuniteti nuk ishte ende në dijeni të shpërthimit të Ebola-s dhe sëmundja nuk ishte identifikuar”, thuhet në deklaratë, duke shtuar se vullnetarët janë ndër viktimat e para të konfirmuara të këtij shpërthimi.

Kryqi i Kuq i Kongos, IFRC dhe Komiteti Ndërkombëtar i Kryqit të Kuq deklaruan se do të vazhdojnë mbështetjen për komunitetet e prekura dhe përpjekjet për frenimin e përhapjes së virusit.

Autoritetet kongoleze shpallën shpërthimin e Ebola-s më 15 maj në provincën Ituri, ndërsa sëmundja është përhapur edhe në provincat Kivu Verior dhe Kivu Jugor.

Sipas Organizatës Botërore të Shëndetësisë, deri tani janë raportuar rreth 750 raste të dyshuara dhe 177 vdekje të dyshuara nga Ebola.