Treg i përbashkët Shqipëri-Kosovë? Kryeministri Rama thotë se anon nga bashkëpunimi rajonal

Kryeministri i vendit, Edi Rama i pranishëm në emisionin “Me Pak Fjalë” në Euronews Albania tha se Shqipëria dhe Kosova kanë intensifikuar bashkëpunimet e tyre në disa sektorë, por pavarësisht kësaj, ai mendon se duhet bërë më shumë.

Sipas kryeministrit, të dyja vendet kanë hapësira të shumta, për të bashkëpunuar për zhvillimin e ekonomisë së tyre.

“Të njëjtat gjëra janë. Heqja e barrierave jo-tarifore, lehtësimi i lëvizjes së njerëzve, mallrave, kapitalit, shërbimeve. Është bërë goxha, por mund të bëhet shumë më tepër kjo nuk diskutohet. Unë nuk dua të bëj komente për të krijuar keqkuptime. Mendoj që ka qenë shumë në fokus një periudhë, pastaj ka dalë nga fokusi për një periudhë tjetër, jo nga ana jonë, por edhe për arsyet e tyre”, tha ai.

Pyetur nga gazetari Neritan Sejamini nëse kryeministri e mbështet krijimin e një tregu të përbashkëta Kosovë-Shqipëri, z. Rama u shpreh se tregu potencial në Ballkanin Perëndimor është më i gjerë se kaq, dhe kjo tha ai është bindje personale.

“Ka shumë hapësirë për t’u integruar, por unë insistoj që tregu i madh potencial këtu është i gjithë rajoni, nuk është vetëm tregu Kosovë-Shqipëri, por është i gjithë rajoni. Kjo është bindja ime”, shtoi Rama.

Kryeministri i Shqipërisë ka qenë një ndër figurat politike shqiptare, i cili e ka mbështetur publikisht krijimin e “Mini-Shengenit Ballkanik”. Ai ka pohuar se ky proces do krijonte lehtësira të reja për vendet e Ballkanit Perëndimor.

LEXONI GJITHASHTU:

• Politikat fiskale të socialistëve nuk po rezultojnë fitimprurëse, thotë gazetari Sejamini
• ‘Shumë borxhe, pak rrugë’, Sejamini pyet kryeministrin Rama pse e ka shtrënguar dorën tek infrastruktura
• Rama dhe Sejamini debatojnë për largimin e investitorëve të huaj nga Shqipëria
• Koalicionet paszgjedhore, Rama: Partitë janë bërë të gjitha bashkë kundër PS
• Edi Rama sqaron në Euronews Albania qëndrimin e kandidates Luljeta Bozo për diktaturën