Trump drejt inkriminimit, prokurorët refuzojnë marrëveshjen

Prokurorja e përgjithshme e Nju Jorkut, Letitia James i ka hapur rrugë inkriminimit të Donald Trump, lidhur me çështjen që ka në fokus kompaninë e tij familjare, Trump Organization.

Lajmin e bën të ditur “New York Times”, sipas të cilës, zyrtarja e lartë ka refuzuar një propozim të ish-presidentit për të gjetur një marrëveshje që do t’i jepte zgjidhje çështjes.

Por përveç se e ka refuzuar ofertën në fjalë, kryeprokurorja po konsideron edhe procedimin e të paktën një prej fëmijëve të miliarderit të pasurive të patundshme: Ivanka, Eric dhe Donald Junior, të cilët kanë qenë gjithashtu drejtues të kompanisë, që akuzohet për evazion fiskal dhe shkelje të shumta financiare.

Por ky nuk është i vetmi telash për Trump. Ndaj tij vazhdojnë hetimet për përvetësimin e dokumenteve të klasifikuara nga Shtëpia e Bardhë, të cilat u konfiskuan muajin e kaluar nga agjentët e FBI-së në rezidencën e tij në Florida.

Ndonëse lidhur me këtë çështje ai arriti një sukses të moderuar pasi gjykata pranoi kërkesën e tij për caktimin e një avokati të pavarur që do të shqyrtojë dokumentet, pozitat e tij kanë pak gjasa të përmirësohen.

Gjithashtu, në shkurt të 2023-shit, ish-presidentin e pret një tjetër gjyq, këtë herë për ngacmim seksual.

LEXONI GJITHASHTU:

• Të dhëna për një shtet që ka aftësi bërthamore, çfarë zbuloi FBI në banesën e Trump
• ‘Dosja Trump’, një ekspert i specializuar do të analizojë dokumentet