Trump i zhgënjyer me Putin, shkurton afatin për marrëveshje me Ukrainën

Presidenti i Shteteve të Bashkuara të Amerikës, Donald Trump, tha sot se është i zhgënjyer me Presidentin e Rusisë, Vladimir Putin, dhe se do ta shkurtojë afatin 50-ditor që i dha Putinit për të arritur një marrëveshje për armëpushim në Ukrainë.

“Jam i zhgënjyer me Putinin. Do ta shkurtoj afatin 50-ditor për arritjen e një marrëveshjeje për Ukrainën. Do t’i jap një numër më të ulët ditësh”, tha Trump përpara një takimi me kryeministrin britanik Keir Starmer në Skoci, raporton Reuters. Agjencia deklaron se Trump, megjithatë, nuk tha se cili do të jetë afati i ri.

Më 14 korrik, gjatë një takimi me Sekretarin e Përgjithshëm të NATO-s Mark Rutte në Shtëpinë e Bardhë, Presidenti i SHBA-së tha se SHBA-të do të vendosin tarifa 100 për qind ndaj Rusisë nëse nuk arrihet një marrëveshje për armëpushim në luftën në Ukrainë brenda 50 ditëve.

“Ne do të vendosim tarifa shumë të rrepta nëse nuk arrijmë një marrëveshje brenda 50 ditëve. Tarifat prej rreth 100 për qind do të quhen tarifa dytësore”, tha Trump, duke deklaruar se tarifat do të futen pa pëlqimin e Dhomës së Përfaqësuesve ose të Senatit të SHBA-së.

Tarifat dytësore nënkuptojnë se sanksionet do të zbatohen edhe për vendet e tjera, domethënë për vendet që blejnë naftë ruse.

LEXONI GJITHASHTU:

• Një ditë pas telefonatës së Trump, Tajlanda dhe Kamboxhia arrijnë armëpushimin
• Trump i drejtohet Evropës: Merrni masa për imigracionin para bisedimeve SHBA-BE