Trump ndaloi studentët e huaj në Harvard, Kina: Do njolloset imazhi i SHBA-së

Administrata e presidentit amerikan Donald Trump ka ndaluar Universitetin e Harvardit të pranojë studentë ndërkombëtarë, një vendim që ka nxitur reagime të forta në Kinë dhe është përshkruar si një hap tjetër në rivalitetin e ashpër midis Uashingtonit dhe Pekinit.

Zëdhënësi i Ministrisë së Jashtme kineze deklaroi të premten se Kina “ka kundërshtuar vazhdimisht politizimin e bashkëpunimit arsimor” dhe se ky veprim “vetëm do të dëmtojë imazhin dhe reputacionin e SHBA-së në botë”.

Reagimet në platformat kineze të mediave sociale, si Weibo, ishin të shumta, ku shumë komentues ironizuan vendimin amerikan. “Është argëtuese t’i shohësh ata duke shkatërruar forcën e tyre,” shkruante një koment që mori qindra pëlqime. Të tjerë shtruan pyetjen: “Pasi kjo rrugë të jetë prerë, a do të jetë ende Harvard i njëjti Harvard?”

Sipas Departamentit të Sigurisë Kombëtare të SHBA-së (DHS), ky vendim është pjesë e një fushate më të gjerë për të kontrolluar praninë e huaj në institucionet arsimore elitare, në kontekstin e një goditjeje ndaj imigracionit. Që nga fillimi i këtij mandati, administrata Trump ka revokuar qindra viza studentore, duke ndikuar drejtpërdrejt në komunitetet ndërkombëtare në SHBA.

Përplasja midis Harvardit dhe administratës amerikane ka qenë e zgjatur, veçanërisht pas kërkesës së qeverisë për ndryshime në operacionet e universitetit, që lidhen me pjesëmarrjen e studentëve dhe stafit të huaj në protesta në kampus gjatë konfliktit Izrael-Hamas.

Ndalimi i studentëve të huaj nga një nga universitetet më prestigjioze në botë mund të ketë pasoja të gjera jo vetëm për marrëdhëniet ndërkombëtare, por edhe për të ardhmen akademike dhe shkencore të SHBA-së.

LEXONI GJITHASHTU:

• Statuja gjigande e Stalinit vendoset në zemër të Moskës, “mesazhi” i Putinit
• Ushtria Amerikane organizon paradën madhështore, përkon me ditëlindjen e Trump