Trump për Putinin: Mund të ketë ambicie përtej territorit të Ukrainës

Gjatë fjalës së tij në samitin e NATO-s në Hagë, Presidenti i SHBA-së, Donald Trump, u pyet për presidentin rus Vladimir Putin, të cilin Sekretari i Përgjithshëm i NATO-s, Mark Rutte, e kishte përshkruar më herët si një “armik”.

I pyetur nëse mendon që Putini ka ambicie territoriale përtej Ukrainës, Trump u përgjigj: “Është e mundur”, duke lënë të hapur mundësinë e planeve më të gjera të Moskës.

Megjithatë, ai shtoi se ka bindjen se presidenti rus “dëshiron të zgjidhë”, duke nënkuptuar një mundësi për ulje të tensioneve nëse krijohen kushtet e duhura. “E konsideroj atë një person që mendoj se është çorientuar,” u shpreh Trump, duke treguar një qasje më e kujdesshme por jo përjashtuese ndaj Putinit.

Trump gjithashtu zbuloi se Putin e kishte telefonuar për t’i ofruar ndihmë lidhur me Iranin, por ai kishte refuzuar ofertën. Pa dhënë shumë detaje, presidenti amerikan theksoi se preferon të trajtojë çështjen e sigurisë në Lindjen e Mesme pa ndërhyrje nga Rusia.

Në lidhje me luftën në Ukrainë, Trump tha se shpreson të arrijë një marrëveshje me Moskën, duke përsëritur besimin e tij se “mund të pajtohet me Rusinë” në këtë çështje. Deklaratat e tij vijnë mes një klime të tensionuar ndërkombëtare, ku qëndrimi i SHBA-së ndaj Rusisë mbetet vendimtar për të ardhmen e konfliktit.

LEXONI GJITHASHTU:

• Samiti i NATO-s/ Trump: Mendojmë se lufta ka mbaruar, rruga drejt paqes është hapur
• “Jeni fuqia më e madhe ushtarake”, Rutte-SHBA-ve: Veproni kur është e nevojshme