Trump thotë se nuk ka dëgjuar nga Irani se po pezullojnë bisedimet

Presidenti i SHBA-së, Donald Trump tha të hënën se nuk kishte dëgjuar nga iranianët se po pezullonin bisedimet me Uashingtonin, por shtoi se heshtja do të ishte në rregull dhe se ishte i gatshëm të priste.

“Mendoj se kemi folur shumë nëse doni të dini të vërtetën. Mendoj se heshtja do të ishte shumë mirë dhe kjo mund të zgjasë për një kohë të gjatë”, tha Trump në një intervistë me NBC News.

“Kjo nuk do të thotë që do të shkojmë dhe do të fillojmë të hedhim bomba kudo atje. Ne thjesht do të heshtim. Do ta vazhdojmë bllokadën. Mendoj se mund të pres sa të duan. Po humbasin një pasuri”, theksoi ai.

Agjencia shtetërore iraniane e lajmeve Tasnim raportoi më parë se Irani po ndalonte negociatat indirekte me SHBA-në pasi Izraeli urdhëroi trupat e tij të shtyheshin më thellë në Liban, duke ndërlikuar përpjekjet diplomatike për t’i dhënë fund luftës tre-mujore.

Trump tha se iranianët ishin negociatorë më të mirë sesa luftëtarët, por se nuk ishte informuar se ata po pezullonin bisedimet.