Trupi i gjetur në një depo i përket 11-vjeçares së zhdukur në Francë, shkaqet e vdekjes ende nuk dihen

Trupi që u gjet të enjten në një depo në Francë, i përket Lianës 11-vjeçare, e cila ishte zhdukur prej ditësh. Trupi i fëmijës është identifikuar zyrtarisht, njoftoi prokurori i Agen-it, Olivier Naboulet.

Trupi kishte veshur rroba të ngjashme me ato të Lianës 11-vjeçare në kohën e zhdukjes së saj. Kjo u zbulua nga prokurori i Agen, Olivier Naboulet, duke shtuar se një autopsi do të kryhet në orët në vijim me qëllim që të nxirren përfundimet mjeko-ligjore në lidhje me shkaqet e vdekjes.

Rasti i nxënëses 11-vjeçare të klasës së gjashtë, e cila u zhduk të premten e kaluar pasdite në qytetin e vogël të Flerance në Francën jugperëndimore, pasi kishte lënë shkollën, ka tronditur vendin.

Në qendër të hetimeve është 41-vjeçari Jerome Barella, i cili tashmë është lënë në paraburgim dhe përballet me akuza për rrëmbimin e të miturës Liana.

Sipas zbulimeve që po dalin në dritë, vitet e fundit ka pasur të paktën tre padi kundër tij për sulme seksuale dhe përdhunime të të miturve të moshës 7 deri në 10 vjeç.