Uashingtoni dhe Kievi: Progres në bisedime, por paqja varet nga Rusia

Negociatorët ukrainas dhe ata amerikanë i kanë bërë bashkërisht thirrje Rusisë që të tregojë një angazhim serioz për një paqe afatgjatë, pasi bisedimet e zhvilluara më herët gjatë javës në Moskë nuk prodhuan një rezultat.

I dërguari i posaçëm amerikan Steve Witkoff dhe Rustem Umerov, sekretar i Këshillit për Sigurinë Kombëtare të Ukrainës, e bënë apelin e tyre pas dy ditë “dialogu konstruktiv” të zhvilluar në Florida.

Dy zyrtarët thanë në një deklaratë se shanset për t’i dhënë fund luftës varen nga gatishmëria e Rusisë për të bërë hapa përpara drejt shtensionimit të situatës dhe ndalimit të vrasjeve.

“Fundi i luftës dhe hapat e duhur drejt armëpushimit dhe shtensionimit janë të nevojshëm për të parandaluar përsëritjen e agresionit”, thuhet në deklaratë.

Bisedimet në Florida kanë pasur si synim informimin e palës ukrainase për bisedimet mes përfaqësuesve të Trump dhe presidentit Putin të zhvilluara ditën e martë.

Witkoff dhe dhëndri i presidentit Jared Kushner kaluan thuajse 5 orë në Moskë dhe në fund të takimit Kremlini deklaroi se asnjë kompromis nuk ishte arritur mbi draftin e Shteteve të Bashkuara për paqen.

Kremlini deklaroi se Putin ishte gati të vijonte takimet me palën amerikane për sa kohë të jetë e nevojshme, por Ukraina dhe aleatët e saj në Evropë kanë vënë në dyshim angazhimin e liderit rus për t’i dhënë fund luftës.

Të premten, presidenti ukrainas Volodymyr Zelensky tha se dëshironte të kishte informacion të plotë mbi atë që ishte diskutuar në Moskë dhe mbi pretekstet me të cilat Putin ka dalë për të vazhduar luftën.