UEFA vendos për finale e Champions League

UEFA ka zyrtarizuar formatin dhe datat për ndeshjet e mbetura të këtij edicioni të Champions League. Pas mbledhjes së organizuar këtë të mërkurë, është vendosur që takimet pas fazës së 1/8-ave do të luhen në Portugali.

Lisbona do të presë tetë skuadrat cerekfinaliste, që do të diskutojnë mes tyre dhe trofeun e Champions League, në një format ndryshe, me nga një takim për raund. Fillimisht do të zhvillohen ndeshjet e mbetura të fazës së 1/8, ku Juventus kërkon kualifikimin ndaj Lionit, Barcelona do të presë Napolin, ndërsa City do të sfidojë Realin e Madridit, e Chelsi do të kërkojë mrekullinë ndaj Bajernit. Këto përballje do të luhen në datat 7 dhe 8 gusht.

Skuadrat e kualifikuara do të udhëtojnë drejt Portugalisë, ku në datën 12 deri në 15 gusht do të luhen çerekfinalet. Gjysmëfinalet do të zhvillohen në datat 18 dhe 19 gusht, ndërsa finalja në datën 23 gusht.

Në të njëjtën formë do të zhvillohen dhe takimet e mbetura të Europa League, por do të jenë katër qytete të Gjermanisë që do të mirëpresin këtë kompeticion. Sfidat mes tetë skuadrave të kualifikuara do të luhen nga data 10 deri në 21 gusht në Duizburg, Gelsenkirshen, Frankfurt dhe Këln.