Ukraina bllokon gazin rus, Zelensky: S’do lejojmë që të pasurohen mbi gjakun tonë

Ukraina nuk do të lejojë më tranzitin e gazit rus përmes territorit të saj duke nisur nga fillimi i vitit të ardhshëm, ka deklaruar presidenti Volodymyr Zelensky pas takimit me liderët evropianë në Bruksel.

Sipas Zelenskyt, ndalimi do të aplikohet për çdo fluks gazi që vjen nga Rusia për të shmangur rrezikun që ai t’i shitet Evropës i maskuar si gaz nga Azerbajxhani.

“Ne nuk do ta zgjasim kalimin tranzit të gazit rus. Nuk do t’u lejojmë atyre të pasurohen me miliarda euro mbi gjakun tonë”, ka deklaruar Zelensky.

Sipas tij, çdo vend në botë që blen edhe diçka të lirë nga Rusia bëhet brenda një kohe të shkurtër skllav i saj, pasi kjo është politika e Moskës.

Lëvizja e Zelenskyt ka gjasa të mos pritet mirë nga kryeministri sllovak Robert Fico, vendi i të cilit mbetet tejet i varur nga gazi rus.

Sllovakia importon çdo vit tre miliardë metër kub nga kompania “Gazprom”, që ka monopolin e gazit rus, duke mbuluar kështu shumicën e kërkesës së brendshme.

Një marrëveshje tranziti mes Ukrainës dhe Gazpromit, nga e cila Kievi fiton të ardhura të vazhdueshme, pritet të skadojë në fund të këtij viti.

Akordi llogarit thuajse gjysmën e eksporteve që Rusia bën në vendet e Bashkimit Evropian përmes gazsjellësve.

LEXONI GJITHASHTU:

• Rusia bombardon kryeqytetin Ukrainas, dy të vrarë dhe disa të plagosur
• Putin: Rusia do t’i arrijë objektivat e saj në Ukrainë