Ukraina nevojë për municione, Rusia avancon në qytetin e Bakhmutit

Ndërsa Rusia vijon të rrisë sulmet në jug dhe lindje të Ukrainës, ushtarët vendas në vijën e frontit deklarojnë se kanë nevojë urgjente për municione dhe avionë për të fituar luftën.

Ndërsa disa herë Rusia ka raportuar se ka qëlluar mbi 20 mijë goditje artilerie në ditë, sipas disa vlerësimeve, Ukraina po qëllon 6 deri në 7 mijë.

Por me këtë ritëm, Ukraina po i harxhon municionet më shpejt nga sa aleatët mund t’ia sigurojnë.

Ministrave të Mbrojtjes të NATO-s, gjatë takimit dyditor në Bruksel, iu bë thirrje nga shefi i Aleancës që të intensifikojnë prodhimin e municioneve, por nuk ka një vendim sa i takon avionëve luftarakë.

“Aleatët e NATO-s po i ofrojnë mbështetje të paprecedent Ukrainës, duke iu përmbajtur të drejtës së saj për vetëmbrojtje. Që nga fillimi ne kemi punuar ngushtë me BE-në në aspektet e kësaj mbështetjeje, për sa kohë të jetë e nevojshme”, tha kreu i NATO-s, Jens Stoltenberg.

Aktualisht besohet se Rusia po planifikon një ofensivë të re, por ndërkohë ajo po rrit presionin në afërsi të qytetit të Bakhmutit, kapja e të cilit do t’i jepte asaj një fitore simbolike në prag të përvjetorit të parë të luftës.

LEXONI GJITHASHTU:

• Ukraina: Rusia po djeg trupat në Krime për të fshehur humbjet
• Ukraina dhe Rusia këmbejnë dhjetëra të burgosur të luftës