Ukrainasit avancojnë në Kursk, Zelensky: Po e arrijmë qëllimin, por na duhen armë

Ukraina ka deklaruar se trupat e saj kanë fituar më shumë terren në rajonin e Kurskut, duke avancuar me nga dy kilometra dhe duke kapur mbi 100 ushtarë rusë.

Në fjalimin e përnatshëm, presidenti Zelensky tha se Ukraina po e arrin qëllimin strategjik në Kursk, por u bëri thirrje aleatëve perëndimorë për më shumë armatime.

“Dronët ukrainas po funksionojnë ashtu si duhet. Por ka gjëra që nuk mund të bëhen vetëm me dronë. Fatkeqësisht. Kemi nevojë për armatime të tjera, sidomos raketa. Po vazhdojmë të punojmë me partnerët tanë për një vendim afatgjatë për Ukrainën, pasi këto vendime janë jetike për fitoren tonë”, tha Zelensky.

Ndërkohë, autoritetet ruse deklarojnë se mbi 100 mijë  persona janë evakuuar nga rajoni i Kurskut dhe se rajoni tjetër i Belgorodit ka shpallur gjendjen e jashtëzakonshme.

Të dhënat e fundit vijnë në një kohë kur Ministria britanike e Mbrojtjes ka deklaruar se Ukraina ka të drejtë legjitime të përdorë armët e dhuruara nga Mbretëria e Bashkuar për t’u vetëmbrojtur dhe se kjo nuk i përjashton operacionet brenda territorit rus.

LEXONI GJITHASHTU:

• Rusia vazhdon evakuimin e banorëve nga rajoni i Kurskut
• Trupat ukrainase kanë përdorur tanket britanike Challenger 2 brenda Rusisë