Ultimatumi i Trump ndaj Putinit për luftën në Ukrainë, reagon Kremlini

Kremlini reagoi shkurtimisht të martën ndaj deklaratës së presidentit amerikan Donald Trump, i cili paralajmëroi vendosjen e sanksioneve të reja ndaj Rusisë nëse Moska nuk bën përparim drejt një armëpushimi në Ukrainë brenda 10 ose 12 ditëve.

“Ne e kemi marrë parasysh deklaratën e djeshme të Presidentit Trump. Operacioni special ushtarak vazhdon”, deklaroi zëdhënësi i Kremlinit, Dmitry Peskov, duke iu referuar luftës në Ukrainë me terminologjinë zyrtare të përdorur nga Moska.

Kujtojmë se Trump deklaroi gjatë një vizite të hënën në Mbretërinë e Bashkuar se “nuk ka arsye për të pritur më”, duke shprehur zhgënjimin ndaj Vladimir Putinit për mungesën e përparimit drejt një marrëveshjeje paqeje.

“Thjesht nuk shohim të bëhet ndonjë përparim”, tha ai, duke nënvizuar se ishte gjithnjë e më pak i interesuar të zhvillonte biseda të mëtejshme me liderin rus.

Trump ka pasur gjashtë telefonata me Putinin që nga rikthimi në Shtëpinë e Bardhë në janar, por retorika e tij e fundit shënon një ndryshim të kursit të ndjekur. Ai paralajmëroi fillimisht më 14 korrik për masa ndëshkuese ndaj Rusisë dhe partnerëve të saj ekonomikë brenda një periudhe 50-ditore, afat që do të përfundonte në fillim të shtatorit. Por deklarata e tij e fundit shkurton ndjeshëm këtë afat.

Ndërkohë, Peskov në përgjigjen e tij theksoi: “Ne mbetemi të përkushtuar ndaj një procesi paqeje për të zgjidhur konfliktin në Ukrainë dhe për të siguruar interesat tona gjatë kësaj zgjidhjeje”. Ai zgjodhi të mos i vazhdonte më tej komentet mbi ultimatumin e vendosur nga Trump.

LEXONI GJITHASHTU:

• “Jam i zhgënjyer nga Putini”, çfarë dimë nga shkurtimi i afatit të Trump për Rusinë
• Medvedev paralajmëron Trump: Ultimatumi është një hap drejt luftës me SHBA