Kryeministri Rama vlerëson ndihmën e BE për rimëkëmbjen nga tërmeti

Presidentja e Komisionit Europian Ursula von der Leyen dhe kryeministri Edi Rama po zhvillojnë një konferencë të përbashkët, pas vizitës së Von der Leyen në Tiranë.

Kryeministri Rama vlerësoi kontributin personal të presidentes së KE, si dhe ndihmën e Bashkimit Europian për rindërtimin në Shqipëri pas tërmetit tragjik të nëntorit 2019.

Konferenca e donatorëve dhe fondet që përfitoi Shqipëria janë sipas kreut të qeverisë shqiptare, një arsye konkrete për të mos e humbur durimin ndaj BE, edhe pse siç tha ai, ky i fundit është ‘i lodhshëm’ në disa aspekte.

“Shqiptarët po shohin se rindërtimi po sjell përmirësim të jetës së tyre dhe po mbyllen plagët e tragjedisë pas tërmetit të nëntorit. Këtu dua të nënvijëzoj faktin se kjo nuk është një vizitë protokollare, por edhe vizita e një gruaje që ka mbështetur Shqipërinë dhe shqiptarët pas tragjedisë së nëntorit. Konferenca e donatorëve mbetet historike edhe për vetë BE për nga shpejtësia dhe volumi i angazhimeve të mbledhura aty”, tha kryeministri.

Kreu i qeverisë tha se kishte biseduar me presidenten e KE edhe lidhur me bllokimin e negociatave për Shqipërinë, që sipas tij i ka bërë të gjitha detyrat dhe është në pritje të konferencës së parë ndërqeveritare.

Sipas tij, Shqipëria është në këto momente peng i vetos bullgare ndaj Maqedonisë së Veriut.

“Kemi folur për procesin dhe situatën absurde të Shqipërisë në këtë moment për shkak të vetos bullgare dhe një pengmarrjeje, ndërkohë që ne i kemi kryer të gjitha detyrat dhe presim konferencën e parë ndërqeveritare. Komisioni Evropian është i rreptë, por edhe i parashikueshëm pasi raportohet me fakte dhe raportime që mbështeten në përmbushje të detyrave. Në Këshillin Europian fillon një dinamike dhe polemika mes shteteve. Mjafton njeri ta bllokojë si sot Bullgaria, që për arsyet e veta ka marrë peng procesin”, tha z. Rama.