Pas vendimit të papritur të Uashingtonit për të pezulluar ndihmat ushtarake për Ukrainën, liderët e Bashkimit Evropian do të mblidhen të enjten në Bruksel për të diskutuar masat që mund të ndërmarrin për të forcuar mbrojtjen e BE-së kundër kërcënimeve nga Rusia.

Shefja e Komisionit Evropian, Ursula von der Leyen, tha para takimit se pyetja kryesore tani është nëse Evropa është e përgatitur të veprojë me vendosmëri dhe shpejtësi, duke u përballur me një situatë që po përshkallëzohet. Ajo prezantoi një plan financiar shumëdimensional, me një vlerë prej 870 miliardë dollarësh, për mbrojtjen e bllokut të 27 shteteve anëtare të BE-së.

Megjithatë, shtetet anëtare të BE-së po përballen me sfida të mëdha në përpjekjet për të riarmatosur veten, përfshirë ekonomitë e brishta dhe popullatën që mbetet e skepticizuar ndaj forcimit të masave ushtarake. Një shqetësim tjetër është rritja e forcave të djathta të skajshme në disa shtete, të cilat shpesh kanë qëndrime më të favorshme ndaj Rusisë.

Një nga shqetësimet kryesore është edhe mundësia e largimit të administratës Trump nga aleanca tradicionale transatlantike, një faktor që ka ngritur pyetje për të ardhmen e Bashkimit Evropian. Ian Lesser, drejtor i zyrës së Brukselit i Fondit gjerman Marshall, theksoi: “Kjo krijon disa sfida të mëdha për të ardhmen e Bashkimit Evropian – dhe mendoj se evropianët janë shumë të vetëdijshëm për këtë.”

Përballë këtyre sfidave, Von der Leyen dhe liderët e tjerë evropianë do të duhet të vendosin nëse do të veprojnë kolektivisht për të mbrojtur sigurinë e Evropës, apo nëse shtetet anëtare do të ndjekin strategji të ndryshme dhe të veprojnë më vete.

LEXONI GJITHASHTU:

• Ndërtimi i një sistemi mbrojtës, Trump zbulon planet për krijimin e “Golden Dome”
• “Tani është radha jonë”, Trump nga Kongresi kritikon tarifat e larta të Indisë