Vaksinat anti-COVID në Kosovë, zëdhënësi i Ministrisë: Brenda pak ditësh bëjmë të ditur për publikun sa kushtuan

Kosova ka mundur të sigurojë 535 doza të vaksinës së Pfizer. Dozat e para pritet të vijnë në muajin shkurt, ku prioritet për vaksinim do të kenë punonjësit e shërbimit shëndetësor, personat mbi 65 vjeç dhe grupet e riskut.

Zëdhënësi i Ministrisë së Shëndetësisë së Kosovës, Faik Hoti tha për Euronews Albania se brenda pak ditësh nga ana e qeverisë do të bëhet e ditur për publikun edhe shifra që ka paguar shteti i Kosovës për të blerë vaksinën e Pfizer.

Z. Hoti tregoi se disa muaj përpara se të siguronte vaksinën, Kosova është angazhuar për të krijuar kushtet për ruajtjen e saj, nisur nga fakti se kjo vaksinë kërkon kushte shumë specifike për t’u ruajtur.

“Transporti është sfidë për të gjitha vendet ndaj kemi angazhuar që para disa muajsh një ekspert përmes UNICEF që të rrisë kapacitetin për ruajtjen e vaksinave. Krahas proceduarve të tjera është punuar edhe me ngritjen e kapacitetit të zinxhirit të ftohjes”, tha ai.

I pyetur lidhur me numrin e vaksinave që shteti shqiptar do të dhurojë për Kosovën, zëdhënësi i Ministrisë së Shëndetësisë tha se nuk ka informacion të saktë për numrin e tyre, por shtoi se ky është një akt i mirëpritur në Kosovës dhe se edhe Kosova do të kishte bërë të njëjtën gjë për Shqipërinë.