Injekohen 50 dozat e para të vaksinës në Shqipëri

Shqipëria e hapi siparin e vaksinimit anti-covid me injektimin e dozës së parë tek shefja e Spitalit Infektiv, Najada Çomo dhe kryeministri Edi Rama.

Në ambientet e stadiumit kombëtar “Air Albania”, ku zakonisht gumëzhijnë brohorimat e tifozëve, nuk munguan ovacionet për ‘golin’ e parë në luftën kundër coronavirusit.

Për rreth gjashtëdhjetë minuta mjekë të spitalit Infektiv dhe atij “Shefqet Ndroqi”, të cilit i përkasin grupit prioritar të vaksinimit iu nënshtruan procedurës pak-sekondëshe.

Kryeministri Rama njoftoi mesditën e të hënës se ishte vendosur që procesi të niste një javë më herët, falë dozave të ofruara nga një vend i paemëruar i Bashkimit Europian. Ndërsa javën e tretë të janarit pritet të nisë vaksinimi në kuadër të 500 mijë dozave të siguruara nga kontrata me Pfizer.

Kreu i qeverisë tha se pritet që në ditët në vijim të bëhen transparente procedurat e ndjekura për ruajtjen frigoriferike të vaksinave.

Rama përsëriti thirrjet se vaksina ishte e sigurt dhe jo e detyrueshme, ndërsa ironizoi teoritë konspirative.

“Është e sigurt që vaksina i lë Ilirët Ilirë dhe nuk futet çip në trup për të përgjuar thashethemet e kafeneve,” tha Rama pas marrjes së vaksinës.

Kryeministri gjithashtu theksoi se Shqipëria i qëndron planit për t’i dhuruar Kosovës një sasi simbolike vaksinash.

Procedura do të rinisë nesër në orën 09:00.