Vance: SHBA-ja dhe Irani janë shumë afër një marrëveshjeje, duhet të zgjidhim edhe disa pika

Zëvendëspresidenti amerikan, JD Vance ka deklaruar se SHBA-të dhe Irani ende duhet të zgjidhin disa pika ngërçi përpara se të arrihet një marrëveshje për luftën.

I pyetur nëse presidenti Donald Trump ishte afër nënshkrimit të një marrëveshjeje, Vance tha se ishte shumë herët për të thënë “kur ose nëse” të dyja palët do të finalizonin një marrëveshje.

Marrëveshja thuhet se do të zgjasë armëpushimin për 60 ditë dhe do të nisë bisedime mbi të ardhmen e programit bërthamor të Iranit.

Më herët të enjten, zyrtarët amerikanë thanë se të dy vendet kishin rënë dakord për një kuadër marrëveshjeje, në pritje të miratimit të Trump dhe udhëheqjes së Iranit.

Por agjencia gjysmëzyrtare e lajmeve Tasnim e Iranit raportoi se marrëveshja nuk ishte finalizuar ose konfirmuar.

Duke folur të enjten në mbrëmje, Vance tha se negociatorët debatonin vazhdimisht për disa pika, të cilat përfshijnë “çështjen e pasurimit”.

“Nuk jemi ende atje, por jemi shumë afër dhe do të vazhdojmë të punojmë për këtë,” u tha ai gazetarëve.

SHBA-të kanë kërkuar prej kohësh që Irani të ndalojë prodhimin e uraniumit të pasuruar në nivel të lartë dhe të asgjësojë rezervat e tij ekzistuese, të cilat në teori mund të përdoren për të krijuar armë bërthamore.

Që kur armëpushimi fillestar midis SHBA-së dhe Iranit hyri në fuqi më 8 prill, Trump ka sugjeruar  vazhdimisht se të dyja palët janë afër një marrëveshjeje dhe se negociatat po përparojnë, por deri më tani nuk ka pasur rezultate thelbësore.

Presidenti po përballet me presion në rritje për t’i dhënë fund luftës, përfshirë nga aleatët e shteteve të Gjirit, demokratët që e kundërshtojnë atë dhe disa republikanë në Kongres që kanë ngritur shqetësime në lidhje me kohëzgjatjen e konfliktit.

Trump dhe zyrtarë të tjerë kanë paralajmëruar se opsioni B, një kthim në operacionet luftarake është ende në tryezë.

Axios, i cili raportoi për herë të parë një marrëveshje paraprake midis SHBA-së dhe Iranit të enjten, tha se Trump ishte informuar mbi propozimin, por nuk e miratoi menjëherë atë dhe do të duheshin disa ditë për ta shqyrtuar atë.