Vdekja e 22-vjeçares në Iran, manifestime në Francë e Suedi

Protestat për të drejtat e njeriut, të nisura në Iran pas vdekjes së 22-vjeçares Mahsa Amini që ishte në duart e policisë pasi nuk kishte vendosur si duhet hixhabin, janë përhapur edhe në Evropë.

“Sot nuk bëhet fjalë vetëm për Mahsan, por edhe për të treguar 43 vitet e urrejtjes të Republikës Islamike. Prandaj po protestojmë. Ajo që po ndodh në Iran është një demonstratë e madhe, një revolucion”, thotë Mahboubeh Moradi, aktiviste iraniane që jeton në Francë.

Manifestime janë mbajtur edhe në Suedi. Komuniteti iranian në Stokholm ka parakaluar në rrugët e qytetit duke ngritur postera me 22-vjeçaren Amini, si dhe duke mbajtur flamurin iranian.

“Po bërtasim me zë të lartë parullat tona dhe po përpiqemi që përmes tyre të arrijmë tek politikanët këtu në Suedi dhe në vende të tjera. Kjo është ajo çka mund të bëjmë. Jam shumë e trishtuar që nuk jam me motrat dhe vëllezërit e mi në Iran, të cilët prej 9 ditësh po përballen me diktaturën”, u shpreh Roya Abdi, studente inxhinjerie, Stokholm

Në rreth një javë protesta, në Iran janë arrestuar mbi 730 persona, mes të cilëve 60 gra; ndërsa kanë humbur jetën 50 persona të tjerë, përfshirë 4 fëmijë.

Presidenti ultra konservator i Republikës Islamike, Ebrahim Raisi ka deklaruar se manifestimet e paligjshme do të përballen me ashpërsinë e shtetit.

LEXONI GJITHASHTU

• Presidenti iranian i krahason protestuesit me armiqtë e shtetit
• Protestat masive| Irani bllokon internetin, Musk aktivizon Starlink
• ‘Shamia’ ngre në këmbë Iranin, presidenti Raisi akuzon Perëndimin për hipokrizi