Vdekja e deputetit britanik vë në qendër të vëmendjes sigurinë e politikanëve

Vdekja e deputetit David Amess i cili u vra me thikë gjatë një takimi me zgjedhësit ka vënë në qendër të vëmendjes sigurinë e politikanëve.

Është një traditë në Mbretërinë e Bashkuar të mbash takime ballë për ballë me zgjedhësit, por shumë anëtarë të parlamentit britanik thonë se duhet të ketë një rishikim se si mund të jenë të sigurt gjatë takimit me votuesit. Shqetësimi u ngrit pas vrasjes së dytë të një deputeti në 5 vite.

Amess u godit me thikë në Leigh-on-Sea të premten dhe humbi jetën në vendngjarje. Në vitin 2016, deputetja Jo Cox u qëllua dhe u godit me thikë gjatë rrugës për të takuar zgjedhësit.

Sekretarja britanike e brendshme Priti Patel tha të shtunën se shërbimet e sigurisë janë në gatishmëri për të garantuar qetësinë e deputetëve në mënyrë që ata të vazhdojnë detyrat e tyre si anëtarë të zgjedhur në mënyrë demokratike.

LEXONI GJITHASHTU: 

• Vritet me thikë deputeti britanik
• Policia cilëson ‘sulm terrorist’ vrasjen me thikë të deputetit britanik