Vdes 46-vjeçarja në Pogradec, familjarët pretendojnë mjekim të gabuar

Një grua 46-vjeçare me profesion mësuese ka humbur sot jetën në spitalin e Pogradecit. Familjarët e saj pretendojnë se shkak i vdekjes është bërë mjekimi i gabuar.

Anila Bazelli, 46 vjeçe, është dërguar nga familjarët në urgjencë rreth orës 19:00, pasi nuk është ndjerë mirë. Por më vonë gjendja e saj është përkeqësuar dhe ka ndërruar jetë.

Burime bëjnë me dije se të afërmit kanë akuzuar mjekët dhe infermierët e urgjencës për mjekim të gabuar.

Pyetur nga Euronews Albania, Spitali i Pogradecit tha se i kishte ofruar të ndjerës ndihmën e parë, por për të mësuar shkaqet e vdekjes së saj po presin ekspertizën, e cila do të kryhet në Tiranë.

Ka qenë prokuroria ajo e cila ka kërkuar ekspertizën nga kryeqyteti për të zbardhur rrethanat e vërteta të vdekjes së mësueses.

Burime nga spitali i Pogradecit bëjnë me dije se viktima vuante nga azma, por mbetet ende e paqartë arsyeja e ndërrimit të jetës.