Vëllai i 7 vjeçarit të vrarë në Gërdec: Jam i sigurt që Fatmir Mediu është fajtor

Gerardo Durdaj, vëllai i 7 vjeçarit që mbeti i vrarë në tragjedinë e Gërdecit, u shpreh për Euronews Albania së vendimi i sotëm për rigjykuar ish-ministrin e Mbrojtjes, Fatmir Mediu, do të thotë shpresë për drejtësi.

Ai theksoi se kjo do të jetë një betejë e gjatë ligjore, derisa fajtori të shkojë para drejtësisë.

“Ky është vetëm hapi parë që kjo ngjarje të rizbardhet. Nuk është çështja nëse kemi besim apo jo, drejtësia e re duhet të gjykojë një të pandehur që i është shmangur drejtësisë për të gjykuar, qoftë me ato prova që janë”, u shpreh ai.

Ai theksoi se është i sigurt që Fatmir Mediu është fajtor.

“Nuk tërhiqemi, nuk dorëzohemi derisa drejtësia të vendoset për tim vëlla”, përfundoi ai.

Gjykata e Posaçme e Apelit për Korrupsionin dhe Krimin e Organizuar pranoi sot kërkesën e SPAK për të nisur sërish gjykimin për ish-ministrin e Mbrojtjes, Fatmir Mediu rreth çështjes “Gërdeci”.

Mediu ishte një nga të akuzuarit për shpërdorim detyre për ngjarjen e vitit 2008 ku shpërthimi në një pikë demontimi të municioneve në Gërdec (Vorë, Tiranë) u mori jetën 26 personave.

LEXONI GJITHASHTU:

• Gjykata pranon kërkesën e prokurorisë për të rigjykuar Fatmir Mediun
• Dy argumentet e gjyqtarit për moshapjen e hetimit të Fatmir Mediut