Vëllazërorja Shqipëri-Kosovë, kuqezinjtë duan suksesin e parë ndaj dardanëve të munguar prej një viti

Shqipëria dhe Kosova do të zhvillojnë këtë të mërkurë ndeshjen e tretë miqësore pas njohjes së Kosovës nga FIFA dhe UEFA.

Një përballje e tillë është konsideruar si vëllazërore edhe pse ndeshjet në fushën e lojës kanë pasur rivalitet dhe pas tyre kanë prodhuar edhe debate.

Në dy takimet miqësore në të shkuarën, skuadra kuqezi nuk ka arritur që të fitojë asnjërën prej tyre, teksa në takimin e vitit 2015, në Prishtinë, dy skuadrat e mbyllën ndeshjen në barazim 2-2, ndërsa në qershor të vitit 2018, dardanët fituan pastër 3-0 në Zyrih të Zvicrës.

Nëse historiku flet në favor të skuadrës së Bernard Challandes, momenti duket më i mirë për kuqezinjtë, që në Nations League kanë marrë 5 pikë, ndërsa Kosova nuk ka mundur që të grumbullojë më shumë se 2 pikë në grupin 3 të Ligës C. Dardanët e kanë regjistruar fitoren e fundit më 14 tetor të vitit të shkuar, ose e thënë ndryshe para më shumë se një vitit.

Si Shqipëria ashtu dhe Kosova do të ketë mungesa, për shkak të situatës së krijuar me pandeminë.

Kuqezinjtë në njërën anë do të synojnë fitoren e parë ndaj Kosovës, ndërsa skuadra e Challandes do të provojë për të rikthyer emocionet e një suksesi, pas një kohe relativisht të gjatë.