Vendet G7 i kërkojnë Trumpit të organizojë bisedimet mes Rusisë dhe Ukrainës! Zelensky: Vetëm ai mund ta sjellë Putinin në tryezë

Udhëheqësit evropianë i kanë kërkuar Donald Trump-it të përpiqet të thyejë bllokimin për t’i dhënë fund luftës në Ukrainë duke pranuar propozimin që ai të organizojë bisedime në SHBA midis Volodymyr Zelensky-t dhe Vladimir Putin-it.

Në samitin e G7-ës, presidenti amerikan u ankua për një antipati të madhe midis udhëheqësve ukrainas dhe rusë që e bëri të vështirë arritjen e një zgjidhjeje dhe u zotua të bënte çmos. Ai tha se Moska duhet të bëjë një marrëveshje, duke vënë në dukje se kishte humbur shumë njerëz, njësoj si Ukraina.

Sipas The Guardian, Zelenskyy, i cili po merr pjesë në samitin në qytetin spa të Évian-les-Bains me ftesë të presidentit francez, Emmanuel Macron , po përpiqet të riangazhojë Trumpin me shpresën se administrata amerikane do të jetë më pak e shpërqendruar tani që ka rënë dakord për një armëpushim 60-ditor në Iran.

Nga ana tjetër, Macron u dëgjua duke i pranuar Zelenskyy-t se kishte pasur diskutime të vështira me Trump të hënën në lidhje me Ukrainën. Duke folur në një seancë të mëngjesit të udhëheqësve të G7 dhe Zelenskyy, Trump tha se do të bënte çmos, dhe burime gjermane pretenduan se Trump e pranoi që Rusia ishte në një pozicion më të dobët se më parë.

Udhëheqësit e G7-ës, e cila përfshin SHBA-në, Japoninë, Francën, Kanadanë, Mbretërinë e Bashkuar, Italinë dhe Gjermaninë, ranë gjithashtu dakord të shtojnë sanksionet ndaj energjisë ruse. Bashkimi Evropian tashmë po përgatit paketën e 21-të të sanksioneve, duke përfshirë kufizimet në shitjen e cisternave të LNG-së në Rusi.

Zelensky deklaroi gjithashtu se kishte diskutuar me udhëheqësit e G7 disa propozime që synonin forcimin e sanksioneve dhe “presionin politik” kundër Rusisë, veçanërisht në lidhje me konfiskimin e flotës së saj të naftës në hije, por tha se besonte se do të duhej që presidenti i SHBA-së ta sillte Putinin në tryezën e negociatave.

“Mendoj se Donald Trump mund ta bëjë këtë, kryesisht vetëm ai”, tha ai.