“Vendi rrezikon të shkojë në luftë nëse dorëzohemi”, Hezbollah refuzon të ulë armët

Kreu i lëvizjes Hezbollah, Naim Qassem ka kërcënuar me përballje të hapur nëse qeveria e Libanit vijon me planet për ta çarmatosur grupin militant. Në një reagim, Qassem e ka quajtur projektin qeveritar një vendim për të përmbushur dëshirat e dyshes SHBA-Izrael.

Këshilli libanez i Ministrave e aprovoi vendimin javën e kaluar, duke i kërkuar ushtrisë që të nisë hartimin e një plani çarmatimi dhe që ta përmbushë atë përpara fundit të vitit, duke i hapur sfidën më të madhe Hezbollahut që prej fundit të luftës civile në vitin 1990.

“Vendimi është i rrezikshëm dhe e ekspozon vendin ndaj krizave më të mëdha. Ai zhbën rezistencën e Libanit në rast se do t’i duhet të mbrohet nga agresorët”, ka thënë Qassem.

Ai është zotuar se Hezbollah nuk do t’i dorëzojë armët e saj dhe ka paralajmëruar me konflikt të armatosur, në mos luftë.

“Lëvizja jonë do të luftojë një betejë historike nëse do të jetë e nevojshme kundër projektit amerikano-izraelit. Nuk do të mbetet gjallë askush nëse qeveria përpiqet të përballet me ne”, ka vijuar Qassem.

Kreu i grupimit militant ka fajësuar qeverinë në Bejrut se bart përgjegjësi të plotë për çdo krizë që mund të shpërthejë dhe për shkatërrimin e Libanit. Ai ka hedhur poshtë idenë e mbajtjes së protestave në këtë periudhë, duke nënvizuar se ka ende hapësirë për dialog me ekzekutivin.

“Kjo është toka jonë e përbashkët, atdheu ynë i përbashkët. Ne jetojmë së bashku dhe nuk ka fat tjetër për Libanin”, ka shtuar Qassem, duke paralajmëruar autoritetet.

LEXONI GJITHASHTU:

• Putin jep mesazhin, viziton memorialin e bashkëpunimit ruso-amerikan para takimit
• Trumpin e ndjek ariu në takim me Putin, Zelensky i përgjon! Video me AI në rrjet