Venezuela autorizon rifillimin e fluturimeve për riatdhesimin e emigrantëve nga SHBA

Venezuela ka autorizuar rifillimin e fluturimeve për riatdhesimin e migrantëve nga SHBA, pas kërkesave nga administrata e Trump, thanë zyrtarët të martën.

Ministria e Transportit e Venezuelës tha në një deklaratë se fluturimet nga Phoenix, Arizona drejt Aeroportit Ndërkombëtar Maiquetia pranë kryeqytetit Caracas do të lejohen të operojnë sërish.

Ministria shtoi se fluturimet do të zhvillohen rregullisht të mërkurave dhe të premteve.

Fluturimet kishin operuar dy herë në javë që nga fillimi i këtij viti, por gjatë fundjavës, Venezuela tha se deklarata e presidentit amerikan Donald Trump  se hapësira ajrore e Venezuelës duhet të konsiderohej e mbyllur krijoi konfuzion dhe pezulloi përkohësisht programin.

Sakaq, deklaratat e Trump të shtunën shënuan përshkallëzimin më të fundit të tensioneve mes SHBA-së dhe vendit të Amerikës së Jugut.

“Ndaj të gjitha linjave ajrore, pilotëve, trafikantëve të drogës dhe trafikantëve të qenieve njerëzore, ju lutem konsideroni hapësirën ajrore mbi dhe përreth Venezuelës si të mbyllur tërësisht”, shkroi ai në platformën e tij Truth Social.

Lëvizja vjen pas muajsh të zgjerimit të operacioneve ushtarake amerikane nëpër Amerikën Latine, duke vendosur marinsa, anije luftarake, avionë luftarakë dhe bombardues, nëndetëse dhe drone, mes spekulimeve se Uashingtoni mund të nisë një sulm ndaj Venezuelës.

Deri tani, ushtria amerikane ka kryer 21 sulme ndaj mjeteve të dyshuara të trafikut të drogës, duke rezultuar në vdekjen e të paktën 83 personave që administrata i ka përshkruar si “narko-terroristë”.

LEXONI GJITHASHTU:

• Administrata Trump pezullon kërkesat për emigracionin nga 19 vende
• BE bie dakord të ndalojë importet e gazit rus deri në vitin 2027