Vetingu në pikëpyetje, pas pezullimit të gjyqtarit Luan Daci, KPA do të riorganizojë seancat  

Pezullimi i gjyqtarit Luan Daci duket se ka vënë në pikëpyetje procesin e vetingut në drejtësi. Vendimi i dhënë një ditë më parë nga Gjykata Speciale ka detyruar Kolegjin e Posaçëm të Apelimit të riorganizohet. 

Ky komision do të organizojë punën për vijimin e gjykimeve dhe caktimin e datave për gjykimin e çështjeve, ku gjyqtari Luan Daci nuk është anëtar i trupës gjykuese.

Ndërsa në çështjet, ku gjyqtar Luan Daci është anëtar i trupës gjykuese, Kolegji i Posaçëm i Apelimit do të presë vendimin e Gjykatës së Posaçme Apelit kundër Korrupsionit dhe Krimit të Organizuar.

Veprimi i SPAK për të marrë nën hetim Luan Dacin dhe ta pezullojë nga detyra ka hapur debat mbi vlefshmërinë e vendime të dhëna nga Luan Daci për shkarkimin e dhjetëra gjyqtarëve dhe prokurorëve.

Në një kallëzim të ngritur më 17 janar të këtij viti nga prokurori Besnik Cani, u konstatua se më 24 dhjetor 1997 Luan Daci qe shkarkuar nga Këshilli i Lartë i Drejtësisë për paaftësi dhe shkelje ligjore. KPA është trupa e dytë e procesit të vetingut që kontrollon pasurinë, profesionalizmin dhe integritetin e gjyqtarëve dhe prokurorëve në sistemin e ri të drejtësisë.

Mund të lexoni gjithashtu:

Fshehu shkarkimim për paaftësi, Gjykata e Posaçme përjashton nga sistemi gjyqtarin e Vettingut

Vishaj: Daci t’i hapë rrugë zëvendësimit të tij, të dorëhiqet nga KPA-ja