Vidhen bizhuteri me vlerë rreth 4 milionë euro në muzeun ‘Lalique’ në Francë, nisin hetimet

Bizhuteri me vlerë miliona euro u vodhën të dielën gjatë një grabitje në muzeun e prodhuesit francez të qelqit luksoz Lalique, thanë kompania dhe një burim hetimor.

Autorët hynë me forcë në muzeun në Wingen-sur-Moder në Francën verilindore rreth orës 05:30 të mëngjesit dhe u nisën drejt e në dhomën e bizhuterive.

“Rreth njëzet bizhuteri u vodhën. Humbja po vlerësohet aktualisht, por mund të arrijë në disa milionë euro, ndoshta afër katër milionë”, tha burimi.

Muzeu tha në faqen e tij të internetit se do të jetë i mbyllur për disa ditë për shkak të vjedhjes.

“Një alarm u dëgjua, por në kohën kur kompania e sigurisë kishte përfunduar kontrollet e saj, ishte një pastruese që mbërriti e para në vendngjarje dhe thirri policinë”, thane hetuesit.

Pamjet e kamerave të sigurisë po shqyrtohen aktualisht. Muzeu, i dedikuar argjendarit dhe prodhuesit të qelqit të stilit Art Nouveau dhe Art Deco, Rene Lalique, u hap në vitin 2011 pranë fabrikës së kompanisë.

Një grabitje e xhevahireve gjatë ditës në muzeun e Luvrit në Paris në tetor të vitit të kaluar e vuri sigurinë në muzetë dhe galeritë franceze në qendër të vëmendjes. Hajdutët ia mbathën me bizhuteri me vlerë 102 milionë dollarë nga Luvri në një bastisje që zgjati më pak se tetë minuta.