Dialogu Prishtinë-Beograd vijon nesër në nivel teknik

Dialogu mes Prishtinës dhe Beogradit do të vijojë nesër në takime dyditore të nivelit teknik.

Lajmi u konfirmua për Euronews Albania nga zëdhënësi i BE-së për politikë të jashtme, Peter Stano.

“Mund të konfirmojmë se takimi i ardhshëm i dialogut Beograd-Prishtinë në nivelin e kryenegociatorëve do të mbahet më 7 dhe 8 shtator. Të dy palët pritet të diskutojnë çështjet aktuale dhe hapat e ardhshëm në dialog,” – tha Stano në një përgjigje për Euronews Albania.

Stano shtoi se për sa i përket një takimi të mundshëm të nivelit të lartë mes përfaqësuesëve të dy shteteve, do të ketë njoftime të ardhshme “kur do të shihet e përshtatshme”.

Delegacioni i Kosovës për dialogun me Serbinë kryesohet nga zëvendëskryeministri, Besnik Bislimi.

Agjencia e lajmeve “KosovaPress” raporton se Prishtina pritet të paraqesë në diskutimet që do të bëhen dy ditët e ardhshme pozicionin dhe kërkesat për çështjen e të zhdukurve, marrëveshjen mbi energjinë dhe atë të targave të makinave.

Kryeministri i Kosovës, Kurti, dhe Presidenti i Serbisë, Vuçiç, zhvilluan gjatë muajve qershor dhe korrik takime për sa i përket ecurisë së procesit të normalizimit të marrëdhënieve mes dy vendeve, proces ky i ndërmjetësuar nga BE.

Kurti e Vuçiç kanë shprehur në takimet e tyre qëndrime të ndryshme për sa i përket asociacionit të komunave me shumicë serbe në Kosovë, çështjes së të zhdukurve, por edhe njohjes së pavarësisë.

LEXONI GJITHASHTU:

• Dialogu Kosovë-Serbi, çfarë prodhuan dy takimet e Albin Kurtit me Aleksandër Vuçiç?
• Vuçiç: Kurti po kthehet 150 vite pas, Serbia gati të bisedojë për çdo gjë
• Politologu Nurellari: Kurti naiv dhe amator në dialog, Vuçiç po tregohet inteligjent