Vizita në shtëpinë e deputetit para votimit, Thaçi: Është detyra ime të këshilloj

Presidenti Hashim Thaçi pranoi se ka qenë në shtëpinë e deputetit të ‘Nismës’ Haxhi Shala, por sipas tij, jo për t’i bërë presion apo për ta bindur të votojë qeverinë Hoti, por thjesht për ta këshilluar. Thaçi gjatë një konference për median u shpreh se ai do të këshillonte këdo i cili është pro demokracisë.

“Unë nuk refuzoj së diskutuari për çështje që janë madhore me të gjithë ata që pajtohen dhe të njëjtën kohë që nuk pajtohen. Por edhe në të njëjtën kohë duke u bazuar në eksperiencën time, jo rrallë unë jam këshilla secilit që kërkon nga ana ime se çka i bjen mirë vendit, demokracisë, zhvillimit. Në kuadër të kësaj mendoj, jo vetëm deputeti në fjalë, por kushdo që do të kishte kërkuar prej meje këshillë, unë do këshilloja të votojë për demokracinë, për shtetit, jo për ideologjinë”.

Reagimi i Thaçit erdhi menjëherë pas deklaratës së deputetit të Nismës Socialdemokrate, Haxhi Shala  në parlament i cili deklaroi se do të votonte pro Qeverisë Hoti, pas vizitës së një nate më parë të Presidentit Thaçi në familjen e tij.

“Unë para dy ditëve kam deklaruar që nuk do të votojë Qeverinë Hoti për arsye të monopolizimin të NISMA-s nga dy persona. Por mbrëmë në vizitën që kam pasur tek familja e ish-presidentit dhe familja Haradinaj kam ndërruar mendjen dhe vota ime do të jetë për këta dy persona, pro qeverisë Hoti”

Deputeti i Nismës Social Demokrate, deklaroi të hënën se nuk e dinte nëse do ta votonte qeverinë Hoti; dyshim ky që mori zgjidhje pas ndërhyrjes presidenciale.