Vizita në Tiranë, Thaçi zbardh detajet e bisedës me Metën

Presidenti i Republikës së Kosovës, Hashim Thaçi, ka zhvilluar sot një vizitë në Shqipëri, ndërsa është takuar me kreun e shtetit Ilir Metën dhe kryeministrin Edi Rama.

Kreu i shtetit të Kosovës ka zbuluar detaje rreth takimit që pati me homologun shqiptar. Përmes një shënimi në faqen e tij zyrtare në “Facebook”, Thaçi shprehet se një ndër temat që ka biseduar me Metën ka qenë bashkëpunimi midis dy vendeve, me qëllim që qytetarët t’i rikthehen sa më shpejt normalitetit.

“Me Presidentin e Shqipërisë, Ilir Metën, sot bisedova për rikthimin në normalitet të plotë të jetës së qytetarëve të dy shteteve tona. Sa më shpejt që dy qeveritë e rifillojnë bashkëpunimin, aq më shpejt do t’i rimëkëmbim edhe ekonomitë e vendeve tona”, shkruan Thaçi.

Më tej, Presidenti i Republikës së Kosovës shton se në takim me Metën është biseduar edhe për çështjen e rifillimit të dialogut me Serbinë, temë kjo, që ka shkaktuar tensione dhe akuza midis aktorëve politikë në Kosovë.

“Ne biseduam edhe për rëndësinë e rifillimit të dialogut me Serbinë, i cili presim t’i përmbyllë të gjitha çështjet e hapura me Serbinë dhe të sjellë njohje reciproke ndërshtetërore. Kosova dhe Shqipëria kanë qenë gjithmonë në krahë të njëra-tjetrës dhe si të pandara duhet ta vazhdojnë rrugën e integrimit euroatlantik!”, shton Thaçi.