Vjosa Osmani gjatë takimit me homologun austriak: Me Serbinë asnjë zgjidhje tjetër përveç njohjes reciproke

Presidentja e Kosovës, Vjosa Osmani ka ripërsëritur qëndrimin e saj se me Serbinë nuk do të ketë asnjë zgjidhje tjetër përveç njohjes reciproke me kufijtë aktualë të Kosovës.

Këtë deklaratë Osmani e bëri gjatë konferencës së përbashkët me homologun e saj austriak, Alexander Van der Bellen.

Ajo shtoi se BE-ja duhet t’ia bëjë të qartë Serbisë se nuk mund të luajë me dy karta, por duhet të qartësojë pozicionin e saj.

“Ajo nuk mund të ulet në dy karrige në të njëjtën kohë. Duhet të zgjedhë se cila është rruga e saj e vërtetë, e jo të hiqet si proevropiane në njërën anë dhe ta rrisë bashkëpunimin në çdo sferë me Rusinë, duke rrezikuar të gjithë rajonin tonë nga influenca ruse”, tha ajo në konferencën e përbashkët me homologun e saj austriak.

Osmani theksoi se Serbia në Kosovë ka bërë shumë krime dhe ajo çfarë kërkon vendi i saj është vetëm drejtësia dhe jo hakmarrja.

Sakaq, znj. Osmani e ftoi presidentin serb, Aleksandër Vuçiç që së paku të vendosë një lule në Batajnicë, në shenjë nderimi për qindra fëmijë e civilë shqiptarë të vrarë gjatë luftës në Kosovë.

LEXONI GJITHASHTU:

• Dialogu me Serbinë, Albin Kurti paralajmëron takim me presidentin e Francës
• Takimi Kurti-Vuçiç, Borrell: Inkurajoj të dyja palët të rifillojnë dialogun
• Borrell darkon me 6 udhëheqësit e Ballkanit Perëndimor, Brnabic asnjë komunikim me Kurtin