Vjosa Osmani: Kosova ka nevojë për përkrahjen e Shqipërisë përballë Serbisë

Ushtruesja e detyrës së Presidentes në Kosovës, Vjosa Osmani dhe njëherësh kryetare e Kuvendit të Kosovës gjatë intervistës në ‘Ilva Now’ shprehu nevojën për intensifikimin e bashkëpunimit mes Shqipërisë dhe Kosovë për tu dhënë zë shqiptarëve në arenën ndërkombëtare. Ajo tha se nevoja e një strategjie të re bëhet e domosdoshme pasi Serbia po bën propagandë të tmerrshme duke përfshirë dhe mjete jo legale.

“Shqipëria dhe Kosovë duhet të shikojnë mundësinë për të intensifikuar bashkëpunimin. Na duhet një strategji e re se si t’i qasemi shteteve të tjera. Na duhet koordinim qoftë nga aspekti parlamentar. Duhet të konkretizojmë më shumë këtë strategjinë e re të bashkëpunimit në mënyrë që ndërkombëtarisht edhe Kosova të jetë më e fortë por edhe zëri i shqiptarëve të dëgjohet”, u shpreh znj. Osmani.

Krye parlamentarja e Kosovës mori si rastin më aktual që të po ndodh me shqiptarët në Serbi, që e cilësoi një spastrim etnik të heshtur. Kjo çështje tha znj. Osmani duhet ndërkombëtarizuar në të gjitha institucionet ndërkombëtare.

“Ajo që po ndodh sot në Preshevë është e tmerrshme dhe kjo gjë duhet të dëgjohet ku Serbia po bën një spastrim të heshtur etnik. Duhet të gjejmë një mënyrë që ky problem të ndërkombëtarizohet të dëgjohet në Këshillin e Evropës. Pse të mos iniciohet Komision Hetimor për këtë krim që e bën Serbia. Pse të mos sigurohemi që edhe në OSBE kjo temë tregohet ashtu siç është”, tha presidentja e Kosovës në detyrë.

Znj. Osmani theksoi se Kosovë më shumë se asnjëherë ka nevojë për ndihmën e Shqipërisë në këto momente duke iu referuar propagandës Serbe për të baltosur luftën e UCCK-së.

“Kam kërkuar atë që Kosova ka nevojë për momentin. Kosova ka nevojë për përkrahjen e Shqipërinë në mbrojtjen e qëndrimit tonë në raport me Serbinë, Kosova ka nevojë për përkrahjen e Shqipërisë, si shtet i parë ku ne trokasim sa i përket thënies së të vërtetës ku do në botë pasi Shqipëria e ka derën hapur kudo për shkak të njohjeve, ne nuk kemi zë në shumë vende”, shtoi kryeparlamentarja e Kosovës.

Ndiqni intervistën e plotë: