Vllaznia afron Avdijajn, Teuta prova e forcës për shkodranët

Kategoria Superiore do të rikthehet të premten me ndeshjen më interesante të javës së 13-të mes Vllaznisë dhe Teutës.  Shkodranët e nisin vitin si kryesues të kampionatit dhe pretendimet janë maksimale.

Në Shkodër janë të vetëdijshëm se ndaj “djemve të deti” nuk do të jetë aspak e lehtë, pasi durrsakët janë një nga skuadrat që këtë sezon duan titullin kampion dhe ende nuk e kanë regjistruar humbjen e parë.

“Teuta nuk është mundur asnjëherë dhe ne e dimë diçka të tillë. Kemi një mundësi të mirë për ta mundur Teutën, pasi luajmë në shtëpinë tonë. Ata kanë shumë eksperiencë. Është ndeshje e vështirë dhe kërkon shumë fokus për ta fituar”, tha Thomas Brdariç, trajneri i Vllaznisë.

Vllaznia ka bërë dhe lëvizjen e parë në merkato, teksa ka afruar sulmuesin Albino Avdijaj, i cili ishte pjesë e Tiranës, por nuk arriti që të debutonte me skuadrën bardheblu. Sa i takon javës së 13-të, katër përballjet e tjera do të luhen të shtunën, ku mund të veçohet përballja mes Laçit dhe Kukësit.