Vllaznia e Skënderbeu kalojnë në finale të Kupës së Shqipërisë

Vllaznia dhe Skënderbeu arritën të kualifikoheshin për në finalen e Kupës së Shqipërisë duke eliminuar Laçin dhe Teutën.

Në stadiumin “Loro Boriçi” të Shkodrës, Vllaznia fitoi minimalisht 1-0 ndaj Laçit falë golit të Ardit Hoxhajt në minutën e 22-të. Ndeshja pritej të ishte delikate pas rivalitetit të të dyja skuadrave.

Futbollistët patën herë pas here përplasje me njëri-tjetrin teksa gjyqtari nxori 13 kartonë të verdhë e një të kuq, ku ky i kuqi iu dha në fund nigerianit Erhun Obanor pasi goditi një lojtar të Vllaznisë.

Kartoni i kuq u pa edhe në gjysmë-finalen tjetër Teuta (0-2) Skënderbeu, mirëpo korçarët e panë veten të luanin të paktën një 45-minutësh pa një lojtar pas daljes me karton të dytë të verdhë të Elvi Berishës.

Mesfushori i Skënderbeut festoi duke hequr fanellën golin e realizuar në minutën e 44-të, rreth gjysmë ore pasi qe ndëshkuar njëherë më parë me të verdhë. Golin e parë për Skënderbeun e pati shënuar Jorgo Meksi.

Pavarësisht faktit se luajtën me një lojtar më pak, korçarët e mbajtën avantazhin duke fituar ndaj kryesuesve të kampionatit. Tashmë Kupa duket të jetë ngushëllimi i sezonit për Skënderbeun që po mundohet të luftojë deri në fund për mbijetesë në Superligë.

Finalja Vllaznia-Skënderbeu pritet të luhet më 30 maj. Skënderbeu e ka fituar vetëm një herë Kupën e Shqipërisë në vitin 2018, ndërsa Vllaznia 6 herë, për herë të fundit në vitin 2008.