Flamurtari ka surprizuar në Vlorë teksa në ndeshjen e parë të 1\16 të finales së Kupës së Shqipërisë mposht 2 me 1 Vllazninë e Shkodrës.

Të tre golat u shënuan në pjesën e parë. Të parët që kaluan në epërsi ishin shkodranët me Vulaj, i cili përfitoi nga një gabim në mbrojtje për të zhbllokuar shifrat në minutën e 11-të.

Në minutën e 20-të me një aksion model të ekipit kuq e zi ishte blerja e këtij viti për vlonjatët, Fernando, i cili riktheu balancën mes dy ekipeve. Ndërsa në minutën e 36-të, qendërmbrojtës Disha i dha golin e fitores skuadrës së Flamurtarit.

Pjesa e dytë, me gjithë tentativat e të dy ekipeve, u mbyll me rrjeta të paprekura. Ndërkohë ekipi tjetër i Vlorës Futboll Club Labëria humbi 0 me 3 në fushën e vet kundrejt Kukësit.

Ajo që ra në sy në këtë ndeshje, por edhe në përballjet e tjera të skuadrës vlonjate, ishte numri i pakët i tifozëve në shkallët e stadiumit.

LEXONI GJITHASHTU:

• Shpresë për kualifikimin historik, Vllaznia barazon me Vorsklan në Shkodër
• Mbyllet merkatoja e futbollistëve, cilat janë ekipet me blerjet më të mira