Vllaznia rikthehet në stërvitje, lojtarët dhe drejtuesit arrijnë një marrëveshje për pagat e prapambetura

Pas një bojkoti 3 ditor skuadra e Vllaznisë u rikthye këtë të hënë në stërvitje pasi mosmarrëveshjet mes lojtarëve dhe drejtuesve të bashkisë për pagat e prapambetura tashmë kanë marrë një zgjidhje.

 “Na ka premtuar që do vazhdojnë shumë shpejt me pagesën e lojtarëve. Duke filluar që para ndeshjes me Flamurtarin. Kemi marrë fjalën që do jepen pagesat e plota, pra të katërt muajt” shprehet Gilman Lika, kapiten i Vllaznisë.

U zgjidh një problem por me sa duket një tjetër është në horizont. Kampionati pritet që të fillojë shumë shpejt dhe bojkoti 3 ditor nuk u ka bërë aspak mirë shkodranëve që tashmë janë në garë me kohën për të qenë gati për rinisjen e kampionatit. Edhe pse në kampin shkodran ka optimizëm.

“Ka qenë një pauzë 2 mujore por futbollistët kanë bërë stërvitje individuale dhe shpresojmë që të fillojmë kampionatin” thotë Safet Osja, zv.trajner i Vllaznisë.

Kampionati pritet që të rifillojë në datën 3 qershor edhe pse nuk është dhënë akoma një vendim zyrtar nga autoritet shëndetësore.